خبيرة التجميل " رآنيا " ومجموعة من باقة العناية بالجسم

هذه مجموعة إخترتها لكم من نصائح ووصفات خبيرة التجميل المصرية " رآنيا "

وحقيقه انا اثق فيها وباين على وصفاتها و طريقتها بالتحضير ان كل الي تحضره فاهمة فيه وعارفة الي تعمله .. تظهر ببرنامج بص وطل ولهم ويب بالنت والحقيقه انا تابعتها على اليوتيوب ، والآحلى انها تعمل الوصفه وتحضرها على الهواء مباشرة وهالشيء اعجبني فيها كثير .. ووصفاتها طبيعية وراقية .. وباين عليها من بشرتها وشعرها ماشاء الله تبارك الرحمن .. فحبيت اشاركم وصفاتها ..





ماسك امتلاء الوجه والخدين و امتلاء التجاعيد الرفيعة من خبيرة التجميل رانيا

ماسك بزيت جنين القمح

المقادير:

3 ملعقة صغيرة زيت جنين القمح

3 ملعقة صغيرة زيت عنبر



الطريقة:

اخلطي الزيوت دي مع بعضها، وحطّيهم في برطمان زجاجي واستخدمي منه مرتين في اليوم بعد ما ترجيه كويس، وبتوزّعيه على بشرة وشك والرقبة لكن تجنّبي منطقة العيون.



طريقة عمل بوتكس طبيعي في البيت والنتائج فورية من خبيرة التجميل رانياماسك الحلبة

المقادير:

3 ملعقة صغيرة زيت حلبة

ملعقة كبيرة زيت خروع

ملعقة صغيرة زيت عنبر



الطريقة:

اخلطي الزيوت دي كلها مع بعضها في برطمان زجاجي صغير، وممكن تحتفظي به وتستخدميه من مرة لمرتين في اليوم، بس راعي إنك ترجي البرطمان كويس قبل الاستخدام، وبلاش توزّعي الزيوت دي عند منطقة العين.



الماسك ده بيساعد على امتلاء الوجه والخدين، وكمان بيعمل على امتلاء التجاعيد الرفيعة اللي بتكون موجودة على البشرة.


لتطهير البشرة وعلاج الحبوب اللي بتكون ظاهرة أوي على البشرةحصريا

لوسيون الماء المملح.. لعلاج حبوب البشرة

من الحاجات اللي بتبعتوا تسألوا عليها كتير، هي علاج حبوب البشرة، وكنا عملنا في حلقة قبل كده ماسك بزيت كبد الحوت والعسل، والحمد لله ناس كتير بعتت تشكر في الوصفة، وبتقول إنها ابتدت تجيب نتيجة معاهم، بس المشكلة إن علاج الحبوب بيحتاج لوقت طويل شوية، دلوقتي هاقول لكم على لوسيون تاني ممكن نعمله في البيت، واللوسيون ده بيستخدم لتطهير البشرة وعلاج الحبوب اللي بتكون ظاهرة أوي على البشرة..



كل اللي عليكي علشان تحضّري اللوسيون ده إنك تجيبي كيس ملح طعام عادي وتضيفيه على لتر ميه، وتحطّيهم على النار وتسيبيهم يغلوا لمدة من 15 : 20 دقيقة، وبعد كده بتاخدي الميه دي وتحطّيها في برطمان وتشيليه في الثلاجة، وتاخدي من اللوسيون ده كل يوم بقطنة نظيفة، وتوزّعيه على بشرتك وتسيبيه لمدة 15 دقيقة، وبعد كده تشطفي البشرة بميه عادية، وممكن على آخر اليوم تدهني بشرتك بمسحة خفيفة من زيت اللوز علشان يهدي البشرة، وبتستمري على الماسك ده يوميا لمدة من 7 : 15 يوما.. وإن شاء الله هتلاقي نتيجة ممتازة.





طريقة تصغر شكلك وتقضي علي اجهاد البشرة في الحال

لو بتعاني من ظهور التجاعيد على بشرتك، ولو بشرتك حساسة وبتلتهب بسرعة، ولو بشرتك باهتة ومرهقة ومحتاجة لتغذية ممكن تجربي ماسك ماسك الموز...



المكونات:

موزة

معلقة عسل نحل

عصير ليمون "في حالة البشرة الدهنية"



الطريقة:

بتهرسي الموزة كويس جداً وبتضيفي عليها العسل، ولو بشرتك دهنية بتضيفي نقطتين عصير ليمون، وبتفردي الماسك على بشرتك وتسيبيه حوالي ساعة أو ساعة إلا ربع، وبعد كده بتغسلي وشك كويس بالماء الفاتر.



تفتيح وتنعيم البشرة

ده ماسك هايل لتفتيح البشرة، ومكوناته سهلة وبسيطة..



المكونات:

معلقة كبيرة ترمس مطحون

1/2 معلقة عسل نحل

1/2 معلقة زيت ورد

ماء ساخن جداً للعجن

معلقة ردّة



الطريقة:

بنخلط المكونات كلها مع بعضها ونقلبهم كويس، وندلّك البشرة برفق جداً بالماسك ده في حركات دائرية، ونسيبه على البشرة لمدة ساعة أو ساعة إلا ربع وبعدين نفركه من على البشرة، ونشطف البشرة بماء فاتر.



بيقوّي وينشّط منطقة العين وبيأخّر ظهور التجاعيد ويزيل الخطوط البيضاء

ماسك العسل لنضارة العين

اخلطي العسل مع غذاء الملكات، ووزّعي الخليط على منطقة العين لمدة ربع ساعة، وداومي عليه يوم ويوم لمدة شهر، والماسك ده بيقوّي وينشّط منطقة العين، وبيأخّر ظهور التجاعيد ويزيل الخطوط البيضاء.




ماسك سحرية وسريع للحبوب من خبيرة التجميل رانيا

ماسك اللافندر لِحَب الشباب

الماسك ده بمثابة سنفرة للبشرة، ومهدئ للحبوب، وممكن تحطّيه فوق وتحت العين.



المكونات:

• 3 ملاعق صغيرة عشب اللافندر

• ملعقة صغيرة زيت زيتون

الطريقة:

اخلطي المكوّنات كويس، وحطّيها على بشرة مغسولة، وافركي بشرتك كويس بيه في حركات دائرية من تحت لفوق، وسيبيه على البشرة لمدة نصف ساعة، وبعدين اشطفيه.




ماسك لنظافة البشرة ونضارتها وبيأخر ظهور التجاعيد وعلامات تقدم الس

ماسك الليمون وزيت الزيتون لبشرة نضرة

المقادير:

ملعقة كبيرة زيت زيتون

ثمرة ليمون أخضر كبير

ملعقة كبيرة عسل



الطريقة:

- ابشري الليمونة الخضراء بحيث تاخدي قشرتها بس من غير العصير اللي في قلبها، وبعدها اعصري عليها الليمونة، وبعدها ضيفي العسل، ودوبيه مع الليمون، وبعدها حطي زيت الزيتون وقلبيهم مع بعض.



- حطي الماسك ده على وشك بعد ما تغسليه واعملي بيه مساج لبشرتك، وسبيبيه لمدة 20 – 30 دقيقة، وبعدها اشطفي وشك، الماسك ده بيحافظ على نظافة البشرة ونضارتها، وبيأخر ظهور التجاعيد وعلامات تقدم السن.







وصفة سحرية لتشققات القدمين نظيفة ونضرة وناعمة وكمان لونها فاتح

وصفة سحرية لتشققات القدمين

المقادير:

• ملعقة كبيرة كربونات صودا (هتلاقيها عن العطار)


• مقدار من النشا


• مقدار من الميه


• خل تفاح

الطريقة:

- دوّبي كربونات الصوديوم في الميه، ويفضّل تكون ميه فاترة، بعد كده حطّي فيها رجلك لمدة نصف ساعة، وبعدين اشطفيها بميه عادية جدا.



- بعدين حطّي نشا في علبة بودرة، ورشّي منها على رجلك وسيبيها لحد ما النشا تنشف تماما، وبعد كده انقعي شراب خفيف في خل تفاح أو خل عادي والبسيه، وبعدين البسي كيس بلاستيك وفوقه البسي شراب تقيل، والطريقة دي هتعمليها بالليل قبل ما تنامي، والصبح اغسلي رجلك بالميه العادية، وممكن تدعكيها بليفة خشنة أو حجر.



مع المواظبة على الوصفة دي مرة واحدة أسبوعيا، هتلاقي نتيجة هايلة وَقَدَم نظيفة ونضرة وناعمة وكمان لونها فاتح، وكمان التشققات هتتعالج بنسبة كبيرة جدا.


طريقة سحرية للبشرة شديدة الجفاف من خبيرة التجميل رانيا

الخميرة.. للبشرة شديدة الجفاف

هنعمل مع بعض دلوقتي ماسك من الخميرة، بس عايزة أنبّه في البداية إن الماسك ده من الماسكات اللي ما ينفعش نشيلها في الثلاجة..



المكونات:

• 1/ 2 ملعقة خميرة بيرة


• ملعقة كبيرة عسل


• ملعقة كبيرة لبن بودرة


• صفار بيضة


• ملعقة كبيرة خل تفاح

الطريقة:

بنذوّب الخميرة مع العسل، لغاية ما الخميرة تذوب تماما، وبعد كده نضيف اللبن، ونقلّب كويس جدا، وبعد كده نضيف صفار البيضة، وآخر حاجة هنضيفها هي خل التفاح.



وقبل ما بنوّزع الماسك ده على بشرتنا، بندهن البشرة الأول بطبقة خفيفة جدا من زيت السمسم، ونسيبه على البشرة لمدة 15 دقيقة، بس لازم تكون البشرة نظيفة تماما، وبعد كده نفرد الماسك على الوش كله حتى منطقة العيون، ومش هننسى طبعا منطقة الرقبة.



وبنسيب الماسك لمدة 30 دقيقة، وبعد كده نشطفه بشوية لبن، ونسيبه لمدة ربع ساعة كمان، وبعد كده نشطف الوش بمية فاترة.

لتنعيم وتفتيح الجسم وإزالة الحبوب فورا من خبيرةالتجميل رانيا

سنفرة للبشرة بالملح والليمون لتنعيم وتفتيح الجسم وإزالة الحبوب

المكوّنات:

• بشر 2 ليمونة


• ملعقة كبيرة ملح


• عصير نصف ليمونة

الطريقة:

اخلطي المكوّنات مع بعضها كويس، ولو حسيتي إن العجينة مرملة يبقى كده المكوّنات مظبوطة، أما لو حسيتي إنها جامدة أوي ممكن نضيف عصير ليمون تاني.



بتاخدي الخليط ده وتفركي به جسمك كله بعد ما تدعكي جسمك بالليفة، وبتوزّعيه بشكل دائري، وبتضغطي بشكل أكبر على المناطق اللي فيها حبوب صغيرة في الجسم وخاصة جوانب الرجْل والأرداف، أما منطقة الرقبة فمش بنظغط عليها جامد، وممكن تحطيه على بشرة وشك بس بتسيبيه لمدة دقيقة واحدة بس، أما على الجسم فبتسيبيه لمدة من 5 : 10 دقائق، مش أكتر من كده لأنه بيعمل سنفرة قوية جدا للجسم، وبنستخدم الماسك ده مرة واحدة أسبوعيا، والماسك ده بيدي نتيجة هايلة، وكمان بيعمل نصف درجة تفتيح للبشرة.



ونصيحتي ليكي إنك في كل مرّة تاخدي فيها حمام، وتغسلي شعرك، لازم تعملي أي ماسك سنفرة للجسم من الماسكات اللي قلنا عليها.






ماسك القضاء علي الحبوب في الحال من خبيرة التجميل رانيا

ماسك الخميرة والعسل للحبوب

الماسك اللي هنعمله دلوقتي بنعتبره "الكاسح" للبشرة من الدهون والقشور والحبوب الصغيرة اللي بتكون موجودة على البشرة، وكمان ممكن نعمل الماسك ده على شعرنا...



والماسك عبارة عن:

• 2 قطعة خميرة بيرة (موجودة في الفرن)


• ملعقة كبيرة عسل نحل

الطريقة:

بنخلط الاتنين مع بعض، وهنلاقي إننا بمجرد ما نضيف العسل على الخميرة هتذوب على طول.



وبنوزّع الماسك على الوش كله حتى منطقة العيون، وبنسيبه من 10 : 20 دقيقة، وبعد كده نغسل وشنا كويس، ولو البشرة اللي بنعمل لها الماسك ده شديدة الجفاف، ممكن بعد ما نعمل الماسك، نرّطب البشرة بزيت اللوز الحلو، أو باللبن.




تفتيح وتبيض ونور البشرة في الحال من خبيرة التجميل رانيا




ماسك الترمس والردة

الماسك ده مفيد لتفتيح بشرة الوجه والجسم، وكمان بيروّق البشرة، وبيعمل على إزالة الخلايا الميتة من البشرة..

المقادير:

• ملعقة ترمس


• ملعقة ردة


• ملعقة عسل نحل


• 1/ 4 أو 1/ 2 ملعقة زيت ورد

الطريقة:

هنخلط المكونات ولو هنستخدم زيت الورد يبقى هنخلطه بمية سخنة، أو لو مافيش زيت ورد يبقى هنخلط بمية الورد، ونحط من الماسك على الوجه والجسم.



حاجة كمان بتساعد على تفتيح البشرة؛ هي إننا ناخد شاور كل يوم، وندهن جسمنا بخليط الليمون والجليسرين، وتكون نسبة الليمون أكتر من الجليسرين، ونستمر عليه لمدة شهر، وده هيساعد جدا على تفتيح الجسم.






الماسك الثوري لإزالة التجاعيد من خبيرة التجميل رانيا




الماسك الثوري لإزالة التجاعيد

المقادير:

ملعقة صغيرة عسل نحل

ملعقة صغيرة حبوب لقاح

ملعقة صغيرة لوز مطحون

ملعقة بذر كتان مطحون

قليل من اللبن الحليب سايب للعجن

¼ ملعقة صغيرة غذاء ملكات النحل



الطريقة:

حطّي غذاء ملكات النحل على ملعقة العسل، وضيفي عليهم حبوب اللقاح مع التقليب، وبعد كده ضيفي اللوز المطحون وبذر الكتان المطحون.



وفي حالة إن بشرتك تكون من النوع الجاف، ضيفي شوية لبن على الماسك، ولو مش جافة يبقى نبدّله بالميه أو بمية الورد، وممكن تستخدمي الماسك على بشرة وشك وجسمك وبتسيبيه لمدة 30 دقيقة، وبتعمليه يوم ويوم، ولو سنك فوق الـ45 ممكن تعملي الماسك ده كل يوم، لكن لو سنك تحت الـ20 بتعمليه مرة كل 15 يوم.



لنعومة واحمرار كعب القدم من خبيرة التجميل رانيا

كريم لنعومة واحمرار كعب القدم

المقادير:

ملعقة صغيرة لانولين

ملعقة صغيرة فازلين أبيض

3 ملعقة صغيرة زيت زيتون

ملعقة صغيرة دم غزال



الطريقة:

سيّحي اللانولين مع الفازلين على النار، وبعد كده ارفعيهم وضيفي عليهم زيت الزيتون ودم الغزال مع التقليب المستمر، وبعد كده استخدمي الخليط ده على كعب رجلك.













لتغذية وسنفرة وتنعيم وتفتيح بشرة الوش والجسم من خبيرة التجميل رانيا

ماسك لتغذية البشرة بحبوب اللقاح

الماسك ده مفيد جدا لتغذية وسنفرة وتنعيم وتفتيح بشرة الوش والجسم..



المقادير:

ملعقة صغيرة حبوب لقاح

½ ملعقة صغيرة عسل نحل

½ ملعقة صغيرة زيت لوز حلو

½ ملعقة صغيرة زيت زيتون

¼ ملعقة صغيرة زيت ورد

2 ملعقة كبيرة ميه

قليل من النشا



الطريقة:

اخلطي حبوب اللقاح مع العسل، وضيفي عليه زيت اللوز وزيت الزيتون وزيت الورد مع التقليب، وطبعا بيدي ريحة حلوة أوي، وبعد كده ضيفي النشا على الخليط ده، وقلّبي الخليط كويس جدا، وآخر حاجة هتضيفيها هي الميه، وممكن تستخدمي ميه من الحنفية أو ميه سخنة.



اسرع طريقة لتفتيح منطقة البكيني من خبيرة التجميل رانيا
المقادير:

قطعة خميرة بيرة بحجم عين الجمل

ملعقة صغيرة عسل نحل

ملعقة كبيرة ملح

ملعقة صغيرة خل تفاح

ملعقة حنة



الطريقة:

اخلطي العسل مع الخميرة والملح وخل التفاح، وبعد كده ضيفي الحنة؛ وده علشان تنظيف وإزالة الفطريات.



الماسك ده بيستخدم لمدة 15 يوم بالحنة لإزالة الفطريات وتنقيتها وترطيب ونعومة منطقة البكيني، وبعد الـ15 يوم ممكن نعمل الماسك من غير الحنة، ونسيبه على الجلد لمدة ساعة، وبعدها نشطف الجلد بالميه، وبعدها ادهني بشرتك بأي كريم مرطب أو أي لوشن.


ماسك لشد البطن زي المسطرة في الحال من خبيرة التجميل رانيا

ماسك لشد البطن
المقادير:

• 3 ملعقة طمي مغربي مطحون


• 3 ملعقة لسان البحر مطحون


• خل تفاح

الطريقة:

اخلطي الطمي مع لسان البحر، وضيفي معاهم خل التفاح لغاية ما يكوّنوا عجينة متماسكة، واستخدميها على البطن وأي منطقة فيها ترهلات، وسيبيه لمدة ساعة.


اسهل واسرع سنفرة للبشرة والجسم من خبيرة التجميل رانيا

زيت الجزر لسنفرة البشرة والجسم

المقادير:

• 2 : 3 ملعقة صغيرة زيت جزر


• 2 ملعقة صغيرة لبن بودرة


• 2 ملعقة زيت لوز مر

الطريقة:

اخلطي اللبن البودرة مع زيت الجزر وزيت اللوز، وحطّي الخليط ده على بشرة نضيفة لمدة ساعة كاملة.. وبعد كده اغسلي وشك كويس، وعلى فكرة الماسك ده مناسب لجميع أنواع البشرة.



شد وتنعيم الصدر من خبيرة التجميل رانيا

ماسك الملح

بعد ما ناخد شاور نرش على الصدر ملح كتير ونكبسه، وبعدين نفركه بحركة دائرية بشكل خفيف من أسفل لأعلى وبعدين نشطف الجسم بالميه، وممكن ندهن المنطقة دي بزيت الزيتون.



ماسك الترمس لشدّ ونعومة الصدر

المقادير:

3 ملعقة ترمس مطحون

¼ ملعقة زيت ورد

ملعقة كبيرة لبن بودرة أو لبن عادي

4 ملعقة خل تفاح للخلط



الطريقة:

ضيفي الترمس على اللبن وزيت الورد، واخلطيهم كويس جدا بخل التفاح، والماسك ده بتحطّيه لمدة نصف ساعة على بشرة نظيفة من غير ما تفركي الجسم، ويفضّل يكون بعد الحمام بتاع بالليل.

ماسك الدقيق وخل التفاح لشد الصدر

المقادير:

ملعقة دقيق

1 ½ ملعقة خل التفاح

ملعقة عسل نحل



الطريقة:

ضيفي الدقيق على خل التفاح، وقلّبيهم مع بعض كويس، وبعد كده ضيفي عليهم العسل وقلّبيهم، ووزّعي الخليط ده على منطقة الصدر لمدة نص ساعة أو ساعة على بشرة نظيفة، ونشطفه بالمية.



وناخد بالنا إن الماسك ده يتكرر على الأقل من مرتين إلى 3 في الأسبوع عشان المنطقة دي حسّاسة ولازم يكون ليها عناية خاصة.



لو عايزة ايدين واظافر قوية ومشدودة بعد سن 35 من خبيرة التجميل رانيا

زيت الأفوكادو من الزيوت اللي بتحتوي على نسبة كبيرة من الكولاجين؛ زي زيت الجوجوبا؛ علشان كده أنا بافضل استخدامه بعد سن 35؛ لأنه بيحفّز إنتاج الكولاجين على سطح البشرة علشان يخلي البشرة مشدودة، وخالية من التجاعيد.



ودي بعض الوصفات اللي ممكن نستخدم فيها زيت الأفوكادو للعناية بالأظافر:

1- اخلطي ملعقة كبيرة من زيت الأفوكادو مع ملعقة كبيرة عصير طماطم ورشة ملح بسيطة، وادعكي أظافرك بالخليط ده.


2- اخلطي ثمرة بطاطس مسلوقة ومهروسة ومعاها ملعقة كبيرة عسل وملعقة كبيرة زيت أفوكادو، واعملي بالخليط ده مساج لإيدك، والوصفة دي بتغذّي الأظافر جدا وبتطولها وبتنعم الإيدين جدا، وكمان مفيدة لبشرة الوش.


3- اعملي مساج لأظافرك وإيديكي بخليط من الخميرة البيرة والأفوكادو




ماسك زيت اللبان الدكر لتفتيح الوجه من خبيرة التجميل رانيا

المقادير:

زيت لوز مر

5 نقط زيت ورد

5 نقط زيت قرفة

ملعقة صغيرة زيت ترمس

ملعقة صغيرة زيت لبان دكر


الطريقة:

يُفضّل إن الزجاجة اللي هنحتفظ فيها بالزيوت دي تبقى غامقة، وهنبدأ الأول نملأ ثلاثة أرباع الزجاجة بزيت اللوز المر، وبعد كده نضيف عليها باقي الزيوت.



والماسك ده بيفتّح بشرة الوش والجسم والأماكن الحساسة، وممكن نستخدمه مرتين في اليوم، وممكن نحطّه على الجسم بالكامل ما عدا منطقة فوق وتحت العين، ومع الاستخدام هتحصلي على بشرة فاتحة ومنورة




شاور جل الحنة لازالة اثر حب الشباب نهائيا من خبيرة التجميل رانيا



شاور جل بالحنة

المقادير:

3 ملعقة صغيرة حنة

3 ملعقة كبيرة صابون مغربي

ملعقة صغيرة عصير برتقال (اختياري)

عصير ليمونة





الطريقة:

هنخلط المقادير كلها مع بعض؛ بحيث نحصل في الآخر على شاور له قوام متماسك مش سايل أوي ولا جامد أوي.



نفرد الشاور على الجسم بالكامل ونسيبه من 10 : 15 دقيقة، مش أكتر من كده علشان الحنة ما تصبغش بلون تقيل على البشرة، بعدها بنفركه من على الجسم بالليفة المغربي، وندلّك الجسم من أسفل لأعلى في اتجاه القلب لتنشيط الدورة الدموية، وفي الآخر نشطف جسمنا كويس بالميه العادية.



الشاور ده يفضّل إننا نعمله على أد المرة؛ لأننا مش هينفع نحتفظ به أكتر من يومين أو تلاتة، وبنستخدمه مرة واحدة أسبوعيا، ومع الاستخدام هتحصلي على بشرة ناعمة وصافية جدا لها لون وردي رائع، ده غير إن الحنة بتساعد على تفتيح آثار حب الشباب اللي بتبقى موجودة على الجسم، وممكن نفس الشاور ده نعمله على بشرة الوش، بس مانسيبهوش أكتر من 5 دقايق



.

صنفرة الحمص لجميع انواع البشرة من خبيرة التجميل



وفي البداية عايزة أؤكد إن معظم الماسكات اللي بنعملها لبشرة الوجه بتنفع كمان لبشرة الجسم، لكن مش العكس.



ودلوقتي تعالوا نشوف إيه الماسكات الطبيعية اللي ممكن نعملها لبشرتنا، في الروتين الأسبوعي للعناية بها.



الحمص المطحون لسنفرة البشرة

المقادير:

ملعقة كبيرة حمص شام مطحون

نص ملعقة زيت ورد

مية سخنة





الطريقة:

هنخلط الحمص المطحون مع زيت الورد، وبعد كده نضيف مقدار مناسب من الميه السخنة؛ بحيث إننا لما نقلّب الخليط مع بعضه يدّينا عجينة ليّنة ومتماسكة في نفس الوقت



نبدأ نفرد الماسك ده على الجسم كله، وفي الأول بنحط طبقة من الماسك، ونسيبها لمدة 5 دقايق لحد ما تنشف، وبعدين نحط طبقة تانية، وأسيب كمية من العجين عليها، ونسيب الماسك على جسمنا من نص ساعة إلى ساعة، وبعدين نشطف جسمنا بالميه كويس.



الماسك ده ممكن نستخدمه على بشرة الوجه والجسم بعد ما نغسلهم كويس جدا، وهو بيستخدم كسنفرة لكل أنواع البشرة، وكمان مفيد جدا في إزالة تجاعيد البشرة، وبنعمله مرة واحدة أسبوعيا، ومع المواظبة هتحصلي على بشرة ناعمة ومعطرة جدا.



ماسك الطمي مغربي

المقادير:

طمي مغربي

ميه سخنة





الطريقة:

هنحط الطمي المغربي -وطبعا أفضل طمي اللي بيكون لونه غامق- وبنضيف عليه مقدار من الميه السخنة علشان الطمي يذوب.



الماسك ده بينعّم البشرة ويفتّحها جدا، وكمان بيغذّيها وبيشيل الحبوب الصغيرة اللي بتبقى موجودة تحت الجلد.





نصائح للتغلّب على اسمرار المناطق الحساسة

من المهم جدا إن الماسكات اللي بنستخدمها للوجه نحطها على المناطق الحساسة؛ لأن ناس كتير بتشتكي من السمار في المناطق دي، وعايزة أوضح إن اللي بيعمل سمار في المناطق دي عدة عوامل؛ منها:



1- عدم العناية الشخصية؛ يعني ناس كتير بتستخدم مزيل للعرق قبل ما تنام، ومابتهتمش تاخد شاور يومي قبل النوم.



2- المناطق دي مش بيوصل لها تهوية كافية، زي باقي أجزاء الجسم.



3- عدم الاهتمام بالمناطق دي بعمل ماسكات سنفرة أو مرطبة؛ زي اللي بنعملها للوش والجسم.



علشان كده بأؤكد مرة تانية إن أي ماسكات بنعملها لبشرة الوش، ممكن نستخدمها للعناية بالمناطق دي

:B::rose::B::rose:

الموضوع الأساسي: خبيرة التجميل " رآنيا " ومجموعة من باقة العناية بالجسم

المصدر: منتديات عروس

via منتديات عروس http://ift.tt/1osTmk1